मल्मली तारुण्य माझे तू पहाटे पांघरावे !
मोकळ्या केसात माझ्या तू जीवाला गुंतवावे !
लागुनी थंडी गुलाबी शिर्शिरी यावी अशी, की
राजसा, माझ्यात तू अन् मी तुझ्यामाजी भिनावे !
गर्द राईतून यावा भारलेला गार वारा
तू मुक्या ओठात माझ्या दंशताजे ऊन्ह प्यावे !
चांदण्याचा श्वास जाईच्या फुलांमाजी विरावा ...
आपुल्या डोळ्यात साऱ्या तारकांनी विर्घळावे !
तापल्या माझ्या तनूची तार झंकारून जावी
रेशमी संगीत स्पर्शाचे पुन्हा तू पेटवावे !
रे ! तुला बाहूत माझ्या रूपगंधा जाग यावी ...
मी तुला जागे करावे ! तू मला बिलगून जावे !
